بو دونیایا گؤز آچیب بویا-باشا چاتان هر بیر انسان حیاتی، اؤزونو و کایناتین باره سینده فکرلشدیگی زمان بئینینده بیر سیرا سورغو- سوال لار جانلانیر: «من کیمم؟»، «نئجه و نه اوچون بو دونیایا گلمیشم؟»، «هارادان گلمیشم، هارایا گئدهجهیم؟»، «بو کاینات، جانلی لار، جانسیزلار نئجه یارانیب و بو دونیانین سونو نئجه اولاجاق؟»
عالملری، یئری-گؤیو، بوتون جانلی-جانسیزلاری یارادان آللاه بولارین جاوابینی مخلوقاتین اشرفی اولان انسانا پیغمبرلر گؤندرمکله وئرمیشدیر. الله تعالی آیری-آیری دؤرلرین شراییطینی نظره آلیب بشرین هدایتی اوچون پیغمبرلر گؤندریبدیر. نهایت، انسان یئر اوزونده هر جهتدن داها یوخاری درهجهیه چاتدیقدا، الله تعالی بوتون انسانلار اوچون سونونجو پیغمبری و سونونجو کتابی یعنی حضرت محمد(ص) و قرآن-کریمین گؤندریبدیر. دیل، معنا، سؤز دوزومو، فصاحت و بلاغت، غیبدن خبر وئرمه باخیمیندان ابدی معجزه اولان قرآن-کریم عرب دیلینده نازیل ائدیلمهسینه باخمایاراق، الله تعالی حضرت محمد(ص) واسیطهسیله بشر اؤولادینا گؤندردیگی، دونیا و آخیرت سعادتینین یولونو گؤرسدن کتابدیر.
قرآن-کریمده دؤرد اساس هدف وار: بیرینجیسی، توحیددیرکی، ذاتیندا، صفاتیندا، ایشلرینده، اثرلرینده و حکمرانلیغیندا هئچ بیر شریکی، تایی-برابری و کؤمکچیسی اولمایان تک و واحد بیر معبودا ایمان گتیرمه یی دؤنه-دؤنه تاپشیریر.
ایکینجیسی، پیغمبرلیک و اماملیق موضوعسودور کی اونلار آللاهین امریله انسانلاری هدایت ائدیرلر. اوچونجوسو، معاددیر- اؤلدوکدن سونرا تزه دن دیریلمک ابدی حیاتا قووشماق، عمللری یوخلاماق دئمکدیر. قیامتین هاچان و نئجه قوپماسی، انسانلارین عمللرینین یوخلانیلماسی، جننت، جهنم و آخیرت ائوینه عاید موضوعلاردا بیر چوخ آیهلرده آچیقلانیبدیر.
دؤردونجوسو، عدالت دیر. آیهلرین بیر چوخوندا آللاهین عادل لیگی، کایناتین عدالت ایله یارادیلماسی و آللاهین عدالتینین قیامتده تجلی ائدیب هر کسه گؤردویو یاخشی و پیس عملینین مقابلی وئریلهجه یی کیمی موضوعلار آراشدیریلیر.
الله تعالی قرآن-کریمده مختلف شیوه و اوسلوبلارلا، حکایه، عبرتلی مثل لر چکمکله انسانلارا کئچمیش یاخشیلیق و پیسلیکلریندن درس آلاراق، بو دونیادا نئجه یاشاماغی اؤرگدیر: انسان نئجه ائتسین کی، هم دونیادا، هم ده آخرتده خوشبخت اولسون.
قرآن کریمین ۱۴۰۰ ایل بوندان اول او وقتکی عرب دیلینده نازل اولدوغونو، ائلهجه ده اونون دونیانین بوتون خلقلرینه گؤندریلدیگینی نظره آلاراق، بوگونکو و آیری-آیری دیل لرده خلقلرین اوخویوب آنلاماسی اوچون ایکی مهم ایشین ضروریلیگی حس ائدیلیر: بیرینجیسی، آیهلرین و سؤزلرین نازل اولوندوغو زامانداکی معناسینی، هابئله آیهلرین نئجه، نه اوچون و نه زامان نازل اولوندوغونون دقیق بیلینمه سیندن اؤترو تفسیر علمینه بؤیوک احتیاج دویولور. ایکینجیسی، مختلف دیللی خلقلرین آیهلرین آنلامینی اؤرگشمه سی و اؤز دیللرینده اوخویوب باشا دوشمهسی اوچون قرآن کریمین آیری-آیری دیللره ده ترجمه ائدیلمهسینین ضروریلیگی دانیلمازحقیقتدیر.
باخ ائله بونا گؤره ده آیت الله امام خامنه ای حضرتلری بو موضوعلاری نظره آلیب اوروجلوق آییندا قرآنین تلاوتی ایله برابر اونون ترجمه و تفسیرینه ده دقت یئتیرمگی ضروری بیلیبدیر. آیت الله امام خامنه ای حضرتلریفارس دیلینده بیر نئچه ترجمه و تفسیرلرین ده آدینی چکمیشدیر.
دونیا مسلمانلاری قرآنین ترجمهسینه گیریشمیشلر و هر دورون اؤز دیلی ایله مختلف دیللره ترجمه ائدیبلر. بو گون بعضی فارس، اوردو و تورک دیللری کیمی دیللرده یوز ترجمه یه یاخین ترجمهلر موجوددور. سون واختلاردا دا مسلمان و غیری-مسلمانلار آراسیندا قرآن-کریمین ترجمهسینه بؤیوک دقت یئتیریلیر.
آمما هر بیر حالدا قرآن-کریمین ترجمهسینه احتیاج چوخدور. عربجه بیلمهین مسلمان باجی و قارداشلاریمیز اوچون یاخشی اولار کی قرآنین ترجمهلریندن فایدالانسینلار.
قرآنین هر حرفینده ثواب وار، اوزونه باخماق و تلاوت ائتمک ثوابدیر. ترجمهلر و تفسیرلر ایسه رببیمیزین بیزه اولان سؤزونو آنلاماق و اونا عمل ائتمک باخیمیندان و هم ده دریندن معناسینی باشا دوشمک اوچون بؤیوک اهمیت داشییر. بونا گؤره آذربایجانلی مسلمان باجی-قارداشلاریمیزین قرآن-کریمی اؤز دیللرینده اوخویوب باشا دوشمهسیندن اؤترو قرآن-کریمدن چوخلو ترجمهلر مؤوجوددور.
اومید ائدیریک مسلمان باجی و قارداشلاریمیز بو مبارک اوروجلوق آییندا قرآن-کریمین تلاوتی ایله برابر اونون ترجمهسینه ده دقت یئتیرهجکلر.
